NDR organiza un magosto descomunal!

Ás 8 da noite no campo da festa da anguía, en Barral, Castrelo de Miño.

Como diría Xurxo Souto “CUN MENÚ ASPETACULAR” a só 9€ por persoa (6€ socios) composto de:
- Churrasco, chourizos, pan, viño e refrescos, bica, licor e como non… castañas!

O último día para reservares o teu ticket é o 5 de novembro, no telemóbel 639277252 ou no correo nacionalistasdoribeiro@glz.info

Nota: en caso de choiva trasladaremos o magosto ó local da Asociación en Paradela.

A Asociación de Acción Social e Cultural Nacionalistas do Ribeiro organiza este vindeiro sábado 31 de Outubro o 1º Concurso de Cabazas de Santos.

Haberá agasallos para tod@s e un premio para a autora ou autor da mellor cabaza.

Máis información sobre o evento en Facebook: www.facebook.com/concursocabazas

De onde ven a tradicion de tallar cabazas?

Para afastar dos seus castros ás perigosas ánimas defuntas e errantes adoitaban poñer no alto das muradas, ou encastradas nas paredes, as caveiras iluminadas dos inimigos mortos en campaña. De aquí, dos ritos e crenzas célticas ao redor da caveira, vén a tradición europea de facer caliveras na cortiza dos melóns, cabazas ou calabazotes.

En que data se facía isto?

O calendario celta dividía o ano en dúas metades, a metade escura comezando no mes de Samonios, lunación outubro-novembro, e a metade clara, comezando no mes de Giamonios, lunación abril-maio.

Considerábase que o ano comezaba coa metade escura, así Samonios convertíase no ano novo celta. O Samaín era a festividade máis importante, na que se celebraba o final da tempada de colleitas e era considerada como o “Ano Novo Celta”.

Esta festividade céltica do Samaín descríbese como unha comuñón cos espíritos dos defuntos que, nesta data, tiñan autorización para camiñar entre os vivos, dándoselle á xente a oportunidade de reunirse cos seus antepasados mortos.

Son costumes ancestrais propias do país as de deixar un oco na mesa ou racións de comida para os defuntos ata facer colares coas castañas novas.

Máis información: Galipedia, Galiza Celta e Galicia-Hoxe.

Saída ás 8.30 da mañá dende o Complexo de Turismo Nautico de Castrelo de Miño.

Primeira parada Muros, despois, Monte Pindo e Fervenza do Xallas.

Chegada ó mediodia a Sardiñeiro e xantar no restaurante Casa Lestón.

Pola tarde visita á vila de Fisterra, donde nos estará agardando Alexandre Nerium, poeta galego de Fisterra, e poeta mariñeiro por excelencia, que nos dará unha fermosísima charla sobre o mar, afundimentos e demais mitos, lendas e historias desta terra.

E para acabar ben o día… Solpor no Cabo Fisterra!

Máis información nos seguintes números:
639 277 252 / 647 773 652

E mais tamén no Facebook: www.facebook.com/excursionfisterra

Primeira Edición do Castrelicio, organizada pola Asociación Nacionalistas do Ribeiro.

A asociación Nacionalistas do Ribeiro organiza para este fin de semana unha salutación ó sol despois da noite máis corta do ano. O evento terá lugar no Parque de Castrelo de Miño (área da Festa da Anguía), onde esperaremos espertos/as, quen poida, á saída do sol o domingo sobre as 5:45.

Para quen non poida aguantar en vela, esperamos obter autorización do concello para instalar tendas de acampada. Haberá sardiñada, churrascada, empanada, viño, refrescos e auga do Miño.

Tamén acenderemos unha fogueira onde queimar todos os malos ratos e malos fumes pasados e coa que alumear o camiño do novo día que comeza. Pódese aportar material combustible, especialmente ese obxecto vello que representa esquemas que queremos deixar atrás.

Como socio/a, ou afín, convidote a que te poñas en contacto con nós para confirmar ou non a túa asistencia. Podes facelo mediante o correo electrónico da Asociación: nacionalistasribeiro@mundo-r.com
…ou ben verbal, telefónica ou telepáticamente!

Pretendemos que sexa unha festa aberta a todo o mundo, polo que podes invitar a quen queira vir, que só terá tamén que mercar un tique polo módico prezo de 5 euros, para amortizar os comestibles e os bebestibles.

Sería convinte que tivesemos uns datos aproximados de asistencia antes do vindeiro venres.

A asociación de acción social e cultural Nacionalistas do Ribeiro, inaugurou este domingo, día 22 de marzo, unha exposición de pintura da Asociación de Pintores do Ribeiro. O acto inaugural tivo lugar ás 12 do mediodía.
Esta exposición chega, segundo Nacionalistas do Ribeiro, “tras o éxito de público colleitado coa primeira exposición, Os tempos son chegados, o Himno Galego”.